Blogs Articles

గోలల సమాహారాల మహా గోల "బండ్ల గోల"

నేను రచయితను కాను. అయితే అనుక్షణం నా మదిలో దోబూచులాడుతున్న గోలల సమాహారాల మహా గోలలను అక్షర రూపంలో మిమ్ములను ఆకట్టుకునే విధంగా వ్రాయలేనా? ఏది ఏమైనా అది బాగున్నా బాగలేక పోయినా, మీకు నచ్చినా నచ్చక పోయినా నా విధానంతో వ్రాసి మీ ముందుంచాలనే తాపత్రయమే నా ఈ "బండ్ల గోల".

ప్రపంచ రూపు రేఖలు

కంప్యూటర్ రాకతో ప్రపంచ రూపు రేఖలు, సరిహద్దులు మారిపోయాయి. కంప్యూటర్ నుండి కంప్యూటర్ అనుసంధానం అంతర్జాలం ద్వారా కలసి పోవడంతో మన అభిప్రాయాలను ఒకరికొకరం షేర్ చేసుకోవడంతో ప్రపంచం ఒక కుగ్రామంగా మారి, తదుపరి వచ్చిన స్మార్ట్ సెల్ ఫోన్స్ వలన ఇది మరింత దగ్గరయింది.

ప్రపంచం ఒక కుగ్రామంగా

ఇరవై సంవత్సరాల క్రితం మన భారత దేశంలో ఒక రాష్ట్రం నుండి మరొక రాష్ట్రంలో ఉన్న మన బందుమిత్రులతో మాట్లాడాలంటే ల్యాండ్ ఫోన్ నుండి ట్రంకాల్ బుక్ చేసి మాట్లాడాలి. ఆ ట్రంకాల్ కలవడానికి ఒక గంటా, రెండు గంటల సమయం పడుతుంది అటువంటిది నేడు మన సెల్ పోన్ ద్వారా ప్రపంచలో ఏ ప్రాంతంలో ఉన్న వారితోనయినా ఒక క్షణంలో కనెక్టయి మాట్లాడుకో గలిగాము కొద్ది ఖర్చుతో ఎనిమిది సంవత్సరాల క్రితం వరకు. తదుపరి వాట్సప్ మరియు టెలిగ్రాం రాకలతో, ఎటువంటి ఖర్చు లేకుండా. అంతర్జాలం ద్వారా విదేశాలలో ఉన్నవారితో సయితం ఒక్క క్షణం లో మాట్లాడుకో గలుగుతున్నాం. అంటే నేడు ప్రపంచం ఒక కుగ్రామంగా మారిపోయిందని అర్ధమవుతున్నది కదా! ప్రపంచమే కుగ్రామంగా మారిపోవడంతో మనకు తెలియని సమాచారాలను ఒక క్షణంలో తెలుసుకో గలుగుతున్నాము.

రచయితగా నేను మారలేనా?

నేను తెలుసుకున్న సమాచారాన్ని నా విధానంతో వ్రాసి మీ ముందుంచలేనా? రచయితగా నేను మారలేనా? అనే గోల నా మదిలో తరచూ పుట్టుకొస్తుంది అపుడపుడు. కనుకనే ఈ శీర్షికకు " నా మదిలో అనుక్షణం దోబూచులాడుతున్న గోలల సమాహారాల మహా గోల ’బండ్ల గోల’ " అను హెడ్డింగ్ తో ప్రారంభిస్తున్నాను.

మనుగడ కోసం పోరాటం

మనుగడ కోసం పోరాటం చేయాల్సిందే ప్రతి ఒక్కరూ. సామాన్య కుటుంబం వారయినా, మద్య తరగతి కుటుంబం వారయినా, ఉన్నత స్థాయిలో ఉన్న కుటుంబం వారయినా నిత్యం మనుగడ కోసం పోరాటం చేసే వారే. సామాన్యుడు తన కడుపు నింపుకోడానికి శ్రమ పడుతూ మద్య తరగతి జీవన విధానంలోకి మారాలని పోరాటం, మద్య తరగతి వారు ఉన్నత స్థాయికి చేరాలనే పోరాటం, ఉన్నత స్థాయిలో ఉన్నవారు అదికారం కోసం పోరాటం. తాను గ్రామాద్యక్షుడను కావాలని, యం ఎల్ ఏ కావాలని, ఎం పి కావాలని, మంత్రిని కావాలని, ముఖ్య మంత్రిని కావాలని, ప్రధాన మంత్రిని కావాలని విభిన్న వ్యక్తుల వివిధ మనః స్థాయిలలో, పరిధులలొ ఎవరి పోరాటం వారిదే ఎవరి ఆరాటం వారిదే. ఈ ఆరాట పోరాటాల మద్య కొందరి జీవన రేఖలు మారి పోతుంటాయి. ఉన్నత స్థాయిలో ఉన్న వారు అట్టడుగు స్థాయికి, అట్టడుగు స్థాయిలో ఉన్న వారు ఉన్నత స్థాయి లోకి మారిన వారిని ఎందరినో, మరెందరినో, ఎందరెందరినో మనం చూస్తుంటాం.

ఆరాట పోరాటాలు

నిత్యం జరుగుతున్న ఈ ఆరాట పోరాటాల అలజడుల గోలలతో ప్రతి ఒక్కరి జీవితం ముడిపడి ఉన్నది. అంటే కోట్లాది కోట్ల గోలలతో ప్రపంచం నిత్యం సతమత మవుతున్నది. ప్రజల మద్య ఎవరి గోల వారిదే. అయితే కొందరి గోలలు ప్రత్యేకతతో ఉంటాయి. ప్రస్తుతం ఉన్నటువంటి స్థాయిలోనే నేను ఉంటే చాలు, నాకు ఎటువంటి ఉన్నత స్థాయికి పరుగులు తీయాల్సిన పనిలేదు అంటూ వేరే సంస్థలలో మంచి అవకాశాలు వచ్చినా లేదా మంచి వ్యాపార అవకాశం వచ్చినా వాటి జోలికి వెళ్ళకుండా తన సేవలను, తాను నడుపుతున్న వ్యాపారాన్ని గానీ, లేదా తాను పనిచేస్తున్న సంస్థను గానీ విడవకుండా పని చేసే వారు ఎందరెందరో ఉన్నారు. అయితే వారి జీవితాలను బావి లోని కప్ప లాగా ఎటువంటి ఎదుగూ బొదుగూ లేకుండా ఉన్నారని దెప్పి పొడుస్తుంటారు లోకులు. ఏ పని చేసినా అది మంచైనా గాని లోకుల విమర్శనా గోలలు కాకుల్లా పొడుస్తూ విఘాతాలు కలిగిస్తుంటాయి. ఇటువంటి ప్రతికూల సమయాలలో కూడా ప్రతి విమర్శ చేయకుండా, ఎటువంటి ఉద్రేకాలనూ పెంచటానికి ఆజ్ఞం పోయకుకుండా ఓర్పూ సహనం తో సర్దుకొని ముందు కెళుతూ, ఒక చెంపను కొడితే మరో చెంపను చూపించిన మహానుబావులు జన్మించిన సమాజం మనది.

నిర్ణయం మీదే

ఈ బ్లాగు చదివిన వారికి లేదా విన్న వారికి కొందరికి నవ్వు రావచ్చు ఇదేమి పిచ్చి రాతలు అని, మరి కొందరికి దీనిలో ఏముంది ఈవిదంగా నేను రాయగలుతాను అని తానూ ఒక బ్లాగు రాయటానికి ప్రయత్నించనూ వచ్చు. ఇక్కడ కూడా ఎవరి గోల వారిదే. ఆ గోలలు తాను ఆశించే విధానంపై ఆధారపడి ఉంటుంది. అయితే నేను మీతో చెప్పవలసిన విషయం, నా ఉద్దేశ్యం ఒకటే. మీ జీవన గోలలు మీ అంతరంగంలో దోబూచులాడుతున్న విషయాల కనుగుణంగా మారుతుంటాయి. మీరు ఏది కావాలను కుంటారో అదే పొందుతారు. మీ సంకల్పం గొప్పగా ఉంటే అది గొప్పగానే ముగుస్తుంది. మీరు బ్లాగర్ గా మారాలన్నా, యూట్యూబర్ గా మారాలన్నా, మంచి వ్యాపారవేత్తగా రాణించాలన్నా, డాక్టర్ కావాలనుకున్నా, లాయర్ కావాలనుకున్నా, స్వదేశంలో స్థిర పడాలనుకున్నా, విదేశాలలో స్థిర పడాలను కున్నా, ఏది కావాలని ఏమి అనుకున్నా అంతా మీ చేతుల్లోనే ఉన్నది. మహనీయులు స్వర్గీయ అబ్దుల్ కలాం గారు అన్నట్లు పేదవానిగా పుట్టడం నీ తప్పుకాదు పేదవానిగా చనిపోవడమే నీతప్పు. నిర్ణయం మీదే మీ సంకల్పానికి కొద్ది శ్రమ తోడయితే మీరు అనుకున్నది సాధిస్తారు. విజయం మీదే

నా ఉద్దేశ్యమూ, సంకల్పమూ "బండ్ల గోల"

ఈ చరా చర ప్రపంచంలో జరుగుతున్న గోలలతో నా మదిలో దోబూచులాడుతున్న గోలలను నా విధానంతో అక్షర రూపంలో మీ ముందుంచాలనే ప్రయత్నమే నా ఈ "బండ్ల గోల". నేను చెప్పబోయే వన్నీ అందరికీ తెలిసినవే అయినప్పటికీ నా విధానంతో రాసి మీ ముందుకు తెస్తున్నాను. ఇందులోని విషయాలన్నీ మన సమాజంలో జరుగుతున్నవే నని, తెలిసిన విషయాలనే మళ్ళీ మళ్ళీ మా ముందుకు తెస్తున్నావనీ, వాటికి ఏవేవో అర్ధాలు తీయకండి...... ముందు ముందు నా నుండి రాబోయే బ్లాగుల ద్వారా మీరే తెలుసు కుంటారు. మీకు తెలిసిన విషయాలే అయినా సమయానికి జ్ఞప్తికి రానివి ఎరుకలోకి వచ్చాయని. ఏవేవో తీపి జ్ఞాపకాలు, మాటలు, కబుర్లు, అభిప్రాయాలు కలబోసిన నా బ్లాగ్ ఆలోచింపజేసేవిగా వారం వారం ప్రతి ఆది వారం కనీసం వారానికి ఒకటి అయినా మీ ముందుంచాలనే ప్రయత్నం నా ఈ "బండ్ల గోల".

రచయితగా మారవచ్చు

నా బ్లాగుల ద్వారా బ్లాగు వ్రాయడం ఇంత సులభం గా వ్రాయవచ్చు, ఏమీ వ్రాయని వారుకూడా రచయితగా మారవచ్చు అని చెప్పడమే నా ఈ "బండ్ల గోల" బ్లాగు ఉద్దేశ్యం. చదివి నా రాతలను ప్రోత్సహిస్తారని మరియు మీ రాతలకు కూడా పదునుబెట్టి, మంచి రచయితగా మారాలని పాఠక మిత్రులందరికీ మనవి చేసుకుంటూ..... నేను వ్రాసిన కొన్ని బ్లాగుల లింకులను క్రింద ఇస్తున్నాను, వాటిపై క్లిక్ చేసి వీక్షించవలసినదిగా కోరుచున్నాను.

గోలల సమాహారాల మహా గోల ’బండ్ల గోల’