నేను గాయకుడిగా మారాను

పాడు వానిగా మారి పోయా

నేను చెబుతున్నది నిజమేనండి. నేను పాడు వానిగా మారి పోయా. స్వతహాగా నేను పాడువానను కాను. నేను పాడు వానిగా మారింది ఇద్దరు బాల్య స్నేహితుల వలన. ఆ బాల్య స్నేహితులిద్దరూ, వేర్వేరు ప్రదేశాలలో ఒకరు తెలంగాణా రాష్ట్రంలో, మరొకరు ఆంధ్ర ప్రదేశ్ రాష్ట్రంలో బిజీ బిజీ గా ప్రాక్టిస్ తో ఉన్న ప్రముఖ డాక్టర్ల వలన సాధ్యమయినదని మీకు నేను అతి సంతోషంగా తెలియ జేస్తున్నాను. నన్ను పాడువానిగా మార్చిన నా బాల్య స్నేహితులైన డాక్టర్లు ఇరువురికీ నా కృతజ్ఞతలు తెలియజేస్తున్నాను. ఈ విషయం మీకు ఆశ్యరంగా ఉండవచ్చు. ఇది నూటికి నూరుపాళ్ళూ, నా మార్పు కు తెర తీసిన విషయాలతో ఉన్న టాపిక్. ఏమిటా టాపిక్? ఏమిటా విషయం? ఏమిటా మార్పు? అంటే ఇది చదివి మీలో కొందరయినా చైతన్యవంతు లవుతారని ఈ విషయాన్ని ఇక్కడ పోస్ట్ చేస్తున్నాను.

వాట్సప్ గ్రూప్

నరసరావుపేట మునిసిపల్ హైస్కూల్ లో చదివిన మా బాచ్ బాల్య మిత్రులము అందరమూ ఒక వేదికపై ఉండి చిన్ననాటి స్కూల్ విషయాలు మరియు నరసరావుపేట విషయాల గత సృతులను జ్ఞప్తికి తెచ్చుకొని ఒకరికొకరము షేర్ చేసుకోవడానికి అనువుగా వాట్సప్ MHS 10th Group ను క్రియేట్ చేసాను. అనుకున్న విధంగా చిన్న నాటి పాత విషయాల జ్ఞాపకాలను పంచుకుంటూ, మా మునిసిపల్ హైస్కూల్ 10th వాట్సప్ గ్రూప్ సజావుగా రన్ అవుతున్న సమయాలలో అప్పుడప్పుడు MHS 10th Group లోని మిత్రులు కొందరు, గ్రూప్ కు సంబంధం లేని పోస్టులను పంపుతుండే వారు. MHS 10th Group కు సంబంధం లేని పోస్టులు చేరినప్పుడల్లా డాక్టర్ కర్రా నాగ మల్లేశ్వర రావు గ్రూప్ నుండి లెఫ్ట్ కావడం, లెఫ్ట్ అయినపుడల్లా ఇట్లాంటివి జరగకుండా చూస్తానని చెప్పడం జేరడం, మళ్ళీ మళ్ళీ లెఫ్ట్ కావడాలు జేరడాలు జరుగుతున్నాయి.

ప్రతి ఒక్కరికీ ఉపయోగకరమైన విషయం

MHS 10th Group కు సంబంధం లేని పోస్టులు చేరినప్పుడల్లా డాక్టర్ కర్రా నాగ మల్లేశ్వర రావు గ్రూప్ నుండి లెఫ్ట్ కావడాలు పలు మార్లు జరుగుచుండటం వల్ల, నేనునూ విసుగుచెంది, చివరిగా డాక్టర్ కర్రా నాగ మల్లేశ్వర రావు తో ఫోన్ ద్వారా కాంటాక్ట్ అయినాను. డాక్టర్ కర్రా నాగ మల్లేశ్వర రావు ఫోన్ ద్వారా నాకు చెప్పిన విషయమేమిటంటే, మనము ప్రతి ఒక్కరమూ పాత విషయాలను నెమరు వేసుకుంటూ ఉండటం చాలా చాలా మంచిది. పాత విషయాలను జ్ఞప్తికి తెచ్చుకోవడం నెమరు వేసుకోవడం, చిన్ననాటి విషయాలను జ్ఞప్తికి తెచ్చుకోవడం నెమరు వేసుకోవడం MHS 10th Group లో ప్రతి మిత్రునికీ లభించిన మంచి వరం, మంచి వరం అని ఎందుకు చెబుతున్నానంటే మన మెదడుకు పని చెప్పకపోతే అది మన మెదడు మొద్దుబారి, చివరకు ఎవరినీ గుర్తు పట్టలేని అనారోగ్య దశకు చేరిపోతాము. ఆ జబ్బుని అల్జీమర్స్ అంటారు.

అల్జీమర్స్

అల్జీమర్స్ రాకుండా ఉండాలంటే ప్రతి ఒక్కరూ మెదడుకు పని కల్పిస్తూ ఉండాలి. మన మెదడుకు పదును పెట్టుకునే అవకాశం MHS 10th Group ద్వారా ఉన్నది. అయితే కొందరు మిత్రులు తమ మెదళ్ళకు పని చెప్పకుండా, చిన్ననాటి విషయాలను జ్ఞప్తికి తెచ్చుకోవడానికి ప్రయత్నించకుండా, ఎక్కడివో బయట పోస్టులను కాపీ చేసి విభిన్నమయిన పోస్టులను MHS 10th Group లో పోస్ట్ చేస్తున్నారు అని డాక్టర్ కర్రా నాగ మల్లేశ్వర రావు ఫోన్ ద్వారా చెప్పారు.

నా ఆలోచనలకు శ్రీకారం

డాక్టర్ కర్రా నాగ మల్లేశ్వర రావు ఫోన్ ద్వారా చెప్పిన విషయాలు నా ఆలోచనలకు శ్రీకారం అయి, చిన్ననాటి జ్ఞాపకాలను, సృతులను జ్ఞప్తికి తెచ్చుకోవడం మన ఆరోగ్య సూత్రాలలో ఒకటి అంటూ నా విధానంతో వ్రాసి MHS 10th Group లో పోస్ట్ చేశాను.

ఏ విధంగా పని చెప్పాలి?

డాక్టర్ కర్రా నాగ మల్లేశ్వర రావు నుండి నేను ఫోన్ ద్వారా తెలుసుకున్న అల్జీమర్స్ వ్యాధి, ఆ అల్జీమర్స్ వ్యాధి రాకుండా నా మెదడుకు నేను ఏ విధంగా పని చెప్పాలి అనుకుంటున్న సమయంలో, మరో బాల్య మిత్రుడు డాక్టర్ జవహర్ నుండి నిత్యం, ప్రతి రోజూ ప్రభాత వేళల్లో వస్తున్న పోస్టులు నేను అమలు చేయాలనుకున్న మార్గానికి దారి చూపాయి

డాక్టర్ బందా జవహర్

బాల్య మిత్రుడు డాక్టర్ బందా జవహర్ శుప్రభాత వేళలో నాకు శుభోదయాలు తెలియజేస్తూ, ప్రతి రొజూ పాత కాలం నాటి, అప్పటి తీపి జ్ఞాపకాలతో ఉన్న మెలోడి సాంగ్స్ రోజుకొకటి చొప్పున నా పర్సనల్ వాట్సప్ నంబర్ కు పంపుతున్నారు. ఇది నాలుగు సంవత్సరాల నుండి దారావాహికంగా విరామం లేకుండా ప్రతి రొజూ ఉదయం డాక్టర్ బందా జవహర్ నుండి ఇప్పటికీ అందుతునే ఉన్నవి. మొదట్లో ఆ పాటలను నేనంతగా పట్టించుకోనూ లేదు అట్లా అని డాక్టర్ బందా జవహర్ కు ఈ పాటలను పంపడం ఆపమని చెప్పనూ లేదు.

వేమన శతకం

అయితే మనం చిన్నప్పుడు చదువుకున్న వేమన శతకం లోని ఒక పద్యం జ్ఞాపకమొచ్చింది. ఆ పద్యమే " అనగ అనగ రాగ మతిశయిల్లుచు నుండు తినగ తినగ వేము తియ్యగ నుండు సాధనమున బనులు సమకూరు ధరలోన విశ్వధాభి రామ వినుర వేమ"

పాడడానికి ట్రై చేసా

డాక్టర్ బందా జవహర్ పంపుతున్న పాటలలో మొదట ఒకటి తీసుకుని పాట పాడడానికి ట్రై చేశా, మొదట్లో నా స్వరం అంతగా సహకరించ నప్పటికీ మళ్ళీ మళ్ళీ ట్రై చేశా పట్టు వీడని విక్రమార్కుడిలా, కొద్దిగా నా స్వరం సహకరించడం మొదలయింది. మహానుభావులు పద్మశ్రీ డాక్టర్ ఘంటసాల వెంకటేశ్వర రావు గారు పాడిన పాటను అదే బాణిలో ఒక నలబై శాతం వరకూ పాడ గలుగుతున్నాను. ముందు ముందు ఇంకనూ నేను బాగా పాడగలను అనే విశ్వాసం నాలో కలిగింది. పాట పాడలేని మొద్దుగా, రాయిగా ఉన్న నేను పాట పాడే శిలగా మారినానని అనిపిస్తున్నది. అది అందమయినదిగా కాక పొయినా ముందు ముందు అందముగా మార్చుకుంటాననే ధైర్యం నాలో కలిగింది.

ఒకే దెబ్బకు రెండు పిట్టలు

దీనితో ఒకే దెబ్బకు రెండు పిట్టలు అనే విధంగా నా విధానం మారిపోయింది. పాటలు మళ్ళీ మళ్ళీ చదువుతూ ఉండటం వలన వచ్చిన జ్ఞాపకం తో చూడకుండా పాడడం వలన అది నా మెదడు లోకి చేరి, నా మొద్దుబారిన మెదడుకు కొంత పని కల్పించి నట్లయినది మరియూ నా స్వరం కూడా మంచిగా మార్పు వస్తున్నది. నాకు ఇంతటి మంచి నూతన అవకాశం కు ప్రేరణ కలిగించిన నా బాల్య మిత్రులు డాక్టర్ కర్రా నాగ మల్లేశ్వర రావు, మరియు డాక్టర్ బందా జవహర్ గార్లకు పేరు పేరునా కృతజ్ఞతలు తెలియ జేయక పోవడం అది నా కృతఘ్నత అవుతుంది

అందమైన జీవితం

మన జీవితాన్ని మనమే అందంగా మలుచుకోవచ్చు. గతం ఎలా జరిగినా - జరిగినది మంచైనా, చెడు అయినా విడిచి పెట్టండి. జరగ బోయేది గడచి పోయిన దానికంటే ఇంకా అందంగా మార్చుకోవాలని, ఈ బ్లాగ్ చదువుతున్న ప్రతి ఒక్కరికీ తెలియ జేస్తున్నాను జీవితాన్ని అందంగా ఆనందంగా మార్చుకోవాలని. మనకు జరగబోయే జీవితాన్ని, మన శేష జీవితాన్ని గడచి పోయిన దానికంటే అందంగా మార్చుకోవాలంటే, అందమైన మార్పులతో మన జీవితం సాగి పోవటానికి మనమిపుడు మునిగి పోయిన వ్యాపకాలను కొనసాగిస్తూనే, అవే కాకుండా వాటితో పాటు మరో క్రొత క్రొత్త వ్యాపకాలను సృష్టించు కోవడమే! అందుకు చిత్ర లేఖనం కావచ్చు, నాట్యమాడటం కావచ్చు, పాటలు పాడడం కావచ్చు, కవితలు వ్రాయడం కావచ్చు, వ్యాసాలు వ్రాయడం కావచ్చు, ఉపన్యాసాలు ఇవ్వడం కావచ్చు, నటించడం కావచ్చు ఏదైనా ఒక వ్యాపకానికి స్వాగతం పలుకుదాం. అవి మంచిగా రావడానికి ప్రతి రొజూ వాటి సాధనలతో మన శేష జీవితాన్ని సంతోషంగా సంపూర్ణం చేద్దాం.

ఆనందం అంతులేనిదైనపుడు

ఆనందం అంతులేనిదైనపుడు అవకాశాలు, వ్యాపకాలు చిన్నవయినా చాలు. అవి మనలను ఆరోగ్య వంతమయిన జీవన విధానంలోకి నడిపిస్తుంది. నాకు మంచి జరిగింది - MHS 10th Group వలన నాకు మంచి జరిగినది. నా జీవిత స్టైల్ మారిపోయింది, జ్ఞాపక శక్తి పెరిగింది, స్వరంలో మార్పు వచ్చింది. దీనికి మార్గ దర్శకులైన నా ప్రియ బాల్య స్నేహితులు డాక్టర్ కర్రా నాగ మల్లేశ్వర రావు మరియు డాక్టర్ బందా జవహర్ ఇరువురికీ పేరు పేరునా మరోసారి కృతజ్ఞతలు తెలియ జేస్తున్నాను.

మీరూ మారండి

మీరునూ ఆరోగ్యవంతమయిన జీవన విధానం లోకి మారుతారని, ఆ మార్పుకు ఇప్పుడే స్వాగతం పలుకుతారని నేను మిమ్మల్నందరినీ కోరుకుంటూ.... నాకు నిత్యమూ డాక్టర్ బందా జవహర్ రోజుకొకటి చొప్పున పంపుతున్న పాటలు మీకునూ కావాలంటే మీ వాట్సప్ లేదా టెలిగ్రాం నంబర్ ను పంపండి. మీ నుండి వచ్చిన నంబర్స్ తో డాక్టర్ బందా జవహర్ గారితో ఒక గ్రూప్ ను క్రియేట్ చేయించి, పాటలు ప్రతి రొజూ మీకు చేరడానికి డాక్టర్ బందా జవహర్ గారిని పోస్ట్ చేసే విధంగా కోరతాను. చివరిగా ఈ బ్లాగ్ ను ఓపికగా చదివిన మీ అందరకూ అభివందనాలు తెలియ జేసుకుంటూ మరో బ్లాగ్ లో కలుద్దాం అంతవరకు శలవ్ నమస్తే - బండ్ల సత్యనారాయణ

నేను పాడిన పాటలు యూట్యూబ్ బండ్ల చానల్ లో పోస్ట్ చేసిన లింకులను కొన్ని క్రింద ఇస్తున్నాను. వాటిపై క్లిక్ చేసి వీక్షించి మీ అభిప్రాయాలను కామెంట్ చేయవలసినదిగా కోరుచున్నాను.

నన్ను పాడు వానిగా మార్చిన నా ఇద్దరు బాల్య స్నేహితుల బయోగ్రఫీల లింకులను క్రింద ఇస్తున్నాను. ఆ లింకులను క్లిక్ చేసి వీక్షించ వలసినదిగా కోరుచున్నాను.